Николай II Последний русский император
Песнь 1
Грядите, людие, поим песнь Христу Богу, раздельшему море и наставльшему люди, яже изведе из работы египетския, яко прославися.
Иисусу: Господи Иисусе Христе Боже мой, помилуй мя.
Славнейшаго Тебе Царя и Владыку Небесных Сил и всякаго создания, Творца же и Господа Триединаго и Единосущнаго Бога молю: отверзи уста моя недостойная пети раба Твоего, святаго мученика царя Николая.
Припев: Святый страстотерпче царю Николае, моли Бога о нас.
Богоспасаемаго земнаго Отечества быв слава и глава, Небеснаго Отечества наследник показался еси, благоверне царю Николае, пролитием крове твоея неповинныя, в нем же ликуя со Ангелы поеши едино Божество Святую Троицу.
Припев: Святый страстотерпче царю Николае, моли Бога о нас.
Венец мученический, многими святыми прочествованный, далече предведевый, душу свою за Святую Русь и за люди своя безропотно положил еси, святый царю, темже во славе на Небеси Престолу Царя Славы со благоверным князем Владимиром предстоиши, с ним же выну предстательствуй о нас.
Слава Отцу и Сыну Святому Духу, и ныне и присно и во веки веков. Аминь.
Богородичен: Суд гневен прииде на ны и разсыпася радость людей Твоих, Богородице, вси бо плачем и рыдаем, и тако глаголем: о мечу Божий, доколе не упокоишися? Престани убо, пощади ны, и воспоим Державу Владычицы нашея, славно бо прославися.
Песнь 3
На камене мя веры утвердив, расширил еси уста моя на враги моя. Возвесели бо ся дух мой, внегда пети: несть свят, якоже Бог наш, и несть праведен паче Тебе, Господи.
Припев: Святый страстотерпче царю Николае, моли Бога о нас.
Изменил еси диадиму царствия тленнаго на венец нетленный Царствия Христова, и за скиптр крест в руку приим, со царицею и чады ныне веселишися.
Припев: Святый страстотерпче царю Николае, моли Бога о нас.
В день Иова многострадальнаго родивыйся, многия страдания претерпел еси: поношение, измену, изгнание, лютое убиение и по смерти клеветы на имя твое честное, обаче не от человек, но от Господа восприял еси воздаяние, темже исходатайствуй сыновом русским спасение.
Припев: Святый страстотерпче царю Николае, моли Бога о нас.
Авсидитийстего Иова житию всекрасному уподобися житие твое, святый страстотерпче: не токмо бо честь и славу, и венец царский, но и живот сам покусися сатана от тебе отъяти, обаче побежден тобою явися.
Слава Отцу и Сыну и Святому Духу, и ныне и присно и во веки веков. Аминь.
Богородичен: Скиптр царствия Всероссийскаго от руку святаго царя прияти благоволила еси, о Владычице Державная, покрывати Русь Святую честным Твоим омофором не престай.
Седален
Кто убо свят, аще не страстотерпец царь Николай? Немы да будут уста льстивыя, глаголющия на праведнаго беззаконие: аще ли не возлюби Христа от юности, яко Борис и Глеб? Аще ли веру святую во искушениих не соблюде, яко Иов? Аще ли чада во благочестии не воспита, яко София премудрая? Аще ли церкви Божия не воздвиже, яко Юстиниан? Аще ли святыя не прослави, яко Макарий? Аще ли братий не защити, яко Елезвой? Аще ли венцем мученическим не увязеся, яко князь Андрей? Аще ли за убийц не молися, яко Стефан? Аще ли за Святую Русь душу свою не положи, яко князь Михаил? Аще сих чтим, того паче прославим, есть бо жертва искупительная за ны.
Слава Отцу и Сыну и Святому Духу, и ныне и присно и во веки веков. Аминь.
Богородичен: Егда предстану пред лицем Создателя моего в день праведнаго суда Его, тогда, Владычице, предстани ми, и вечныя муки избави мя, да не сниду во ад, но да спасуся Твоим, Пресвятая Богородице, заступлением.
Песнь 4
Пришел еси от Девы, не ходатай, ни Ангел, но Сам Господи, воплощься, и спасл еси всего мя человека. Тем зову Ти: слава силе Твоей Господи.
Припев: Святый страстотерпче царю Николае, моли Бога о нас.
Вверенный тебе талант державный, Николае, не в земли сокрыл еси, яко раб неключимый, но делав, яко раб бодрый своего Владыки, егоже и многосугубым Тому принесл еси.
Припев: Святый страстотерпче царю Николае, моли Бога о нас.
Чашу страданий за Христа испиша и крещением, имже Христос крестися, крестишася святии мученицы царственнии, темже и Отец Небесный вас одесную Себе в Царствии Небеснем посади.
Припев: Святый страстотерпче царю Николае, моли Бога о нас.
Да совершится воля Божия, рекл еси, о святый царю, темже в жертву благоприятну себе самого принесл еси во спасение Русския земли.
Слава Отцу и Сыну и Святому Духу, и ныне и присно и во веки веков. Аминь.
Богородичен: Разумейте, непокоривые языцы, и не хвалитеся о мышце своей, зане един есть Град несокрушим, и сия Твоя, Приснодево, Держава и Царство, еже и стоит до скончания века.
Песнь 5
Света подателю и веков Творче, Господи, во свете Твоих повелений настави нас; разве бо Тебе иного Бога не знаем.
Припев: Святый страстотерпче царю Николае, моли Бога о нас.
Храмы Божии создал еси многи и святыя угодники Христовы прославил еси, с нимиже ныне в Неприступнем Божества храме светло ликовствуеши.
Припев: Святый страстотерпче царю Николае, моли Бога о нас.
Преподобнаго Серафима проречение исправляя: царя, мя прославльшаго, аз прославлю: мощи сего из-под спуда на Всероссийстем свещници поставил еси, богомудре Николае, его же молитвами укрепляем, подвиг славный скончал еси.
Припев: Святый страстотерпче царю Николае, моли Бога о нас.
Новаго Николая Мирликийскаго стяжа тя в предстательствах Русь Святая, великомучениче царю Николае, положил бо еси душу твою за люди твоя и чашу страданий за люди согрешившия испил еси, иному бо Богу разве Христа не поклонился еси.
Слава Отцу и Сыну и Святому Духу, и ныне и присно и во веки веков. Аминь.
Богородичен: Богородице всех Царице, православных похвало, еретичествующих шатания разори, мир же подаждь чтущим, Пречистая, честный Твой образ.
Песнь 6
Во глубине греховней содержим есмь, Спасе, и в пучине житейстей обуреваем, но якоже Иону от зверя, и мене от страстей возведи, и спаси мя.
Припев: Святый страстотерпче царю Николае, моли Бога о нас.
Не прикасайтеся к помазанным Моим, глаголет Господь, обаче забыша сия людие Твои, Господи, кровь царя на нас и на чадех наших. Приими убо, Владыко, молитвы Державных страстотерпец, во искупление грехов наших закланных.
Припев: Святый страстотерпче царю Николае, моли Бога о нас.
Пощади, Боже, люди Твоя, лютое убиение царя-мученика не возбранивших, Тебе же Самого беззаконьми нашими распинающих, и отыми меч, землю нашу карающий, царственных мученик мольбами.
Припев: Святый страстотерпче царю Николае, моли Бога о нас.
Немы да будут уста льстивыя, глаголющии яко не за Христа пострада святый царь: сами бо скверноубийцы на стене дома Ипатиева тайными знаки о том написаша, мняще удерживающаго зло от Святыя Руси отъяти, обаче Сама Владычица Небесная совет тех разори.
Слава Отцу и Сыну и Святому Духу, и ныне и присно и во веки веков. Аминь.
Богородичен: Нощь и мрак, и воды пререкания люте истязают землю Твою, се убо прещение Божие и гнев Того есть, но молим Тя, Пречистая, и глаголем: аще хотящи можеши, и вемы, яко умолит Отроковица за Державу Свою.
Кондак, глас 6
Надежда царя-мученика с царицею и чады, и слуги укрепи, и к Твоей любови окрыли, будущий им покой провозвестивши, тех молитвами, Господи, помилуй нас.
Икос
Зря веру Христову благочестивым царем во стране Российстей укрепляему, и не терпя сего, врази Божии погубити христолюбиваго царя-мученика Николая умыслиша, и предаша его неповинней смерти со благочестивою царицею и чады, и слуги, и со всем царственным родом, не прельстишася, яко путь нечестивых погибнет, праведницы же во веки живи будут, и вместо пагубы и вреда сотвориша их славныя мученики и заступники пред Богом. Кровию их и новомученик всех страна Российская, богоборцы угнетаемая, спасена будет, понеже кровь сия семя новой жизни во Христе есть, тех молитвами, Господи, помилуй нас.
Песнь 7
Образу златому на поле Деире служиму, трие Твои отроцы небрегоша безбожнаго веления, посреде же огня ввержени, орошаеми пояху: благословен еси, Боже отец наших.
Припев: Святый страстотерпче царю Николае, моли Бога о нас.
Целомудрию вашему и чистоте поругатися ищуще, нечестивии бесоводимии вас избраша отцу своему диаволу пожрети желающе, но явистеся жертвы Господеви непорочнии, сострадальцы Спасовы, царственнии мученицы, вопиюще: благословен Бог отец наших.
Припев: Святый страстотерпче царю Николае, моли Бога о нас.
Аще и умолкоша мнози страха ради иудейска о убиении царственных страстотерпцев, камение же возопиша: из стен бо дома Ипатиева кровь сочися, ничем же смываемая, во обличение не ведущим пети: благословен Бог отец наших.
Припев: Святый страстотерпче царю Николае, моли Бога о нас.
Восхотевше и самую память о царственных мученицех исторгнути, богоубийц чада дом Ипатиева разрушиша. Оле таковаго безумия! Обаче Господь храмы мучеником сердца людския сотвори, благочестно царя чтущих и вопиющих: благословен Бог отец наших.
Слава Отцу и Сыну и Святому Духу, и ныне и присно и во веки веков. Аминь.
Богородичен: Царица всех пришедши святою иконою Своею Державною, Небесный кров на славу нам устави, имже спасаемся от видимых и невидимых враг нахождения, Сыну Ея вопиюще: Благословен Бог отец наших.
Песнь 8
В пещь огненную ко отроком еврейским снизшедшаго, и пламень в росу преложшаго Бога, пойте дела яко Господа, и превозносите во вся веки.
Припев: Святый страстотерпче царю Николае, моли Бога о нас.
Царства земнаго славу презревши, единаго Христа, нас ради распятаго, возлюбила еси, и Того мужественно исповедающи, венцем мученическим увенчалася еси, всеблаженная царице Александро Новая, темже ныне Престолу Царя Славы на небесех предстоящи, поеши, Господа пойте дела и превозносите во вся веки.
Припев: Святый страстотерпче царю Николае, моли Бога о нас.
Все желание девы святии Ольго, Татиано, Марие и Анастасие, стяжавше ко Единому Владыце, жительства красоту и славу царствия вменисте яко сон, вопиюще, Господа пойте дела и превозносите во вся веки.
Припев: Святый страстотерпче царю Николае, моли Бога о нас.
Царем и мучителем преклониша выи своя на убиение древнии мученицы, тем подобен бысть Алексий царевич, кровь свою неповинную на истерзание отдав убийцем жестоковыйным, взывая, Господа пойте дела и превозносите во вся веки.
Слава Отцу и Сыну и Святому Духу, и ныне и присно и во веки веков. Аминь.
Богородичен: Позлащенною ризою, якоже Царицу, Сын Твой просветив зарею Духа, Тебе одесную Себе постави, Пречистая, Егоже превозносим во вся веки.
Песнь 9
От Бога Бога Слова неизреченною мудростию пришедшаго обновити Адама, ядию в тление падшаго люте, от Святыя Девы неизреченно воплотившагося нас ради, вернии единомудренно песньми величаем.
Припев: Святый страстотерпче царю Николае, моли Бога о нас.
Добро бы было вам не родитися, нечистивии мучители, зане отраднее будет Содому и Гоморре в День Судный, неже святаго царя убийцам, того молитвами, Господи, утверждай православных веру.
Припев: Святый страстотерпче царю Николае, моли Бога о нас.
Язвы на мученическая ваша телеса возложенная, язвы врагу спасения нашего явишася, демонов победители, царственнии мученицы блаженнии, от их же мучительства избавите души наша.
Припев: Святый страстотерпче царю Николае, моли Бога о нас.
Заповедал еси нам, святый царю, не мстите за убиение твое, глаголя яко зло еще умножится в земли Русстей, обаче не зло победит зло, но токмо любовь: темже моли нам любовь к Богу и ближним стяжати.
Слава Отцу и Сыну Святому Духу, и ныне и присно и во веки веков. Аминь.
Богородичен: Ярость Адова и та не возможет на ны, зане Свят есть храм Твой, и о семени Твоем клятся Давид, непрестающа хвала Твоя и Держава Твоя до скончания века.
