Служба Святымъ царственнымъ мученикамъ

Мѣсяца Іулія въ 4-й день (ст. ст.)
иже есть день убіенія Царской Семьи.
Служба святому благовѣрному страстотерпцу Царю Мученику Николаю II, святѣй благовѣрнѣй Царицѣ Мученицѣ Александрѣ, святому благовѣрному царевичу мученику Алексію, святымъ благовѣрнымъ царевнамъ мученицамъ Ольгѣ, Татіанѣ, Маріи и Анастасіи, святѣй благовѣрнѣй книгинѣ преподобномученицѣ Елисаветѣ [1], святымъ благовѣрнымъ мученикомъ царскаго рода, св. преп.-муч. инокинѣ Варварѣ [2] и вѣрнымъ царскимъ слугамъ съ ними убіеннымъ.Вечеръ, Блаженъ мужъ: 1-й антифонъ.

На Господи воззвахъ, стихиры на 8, гласъ 6. Подобенъ: Всю отложивше.

Яже издревле святая Русь егда начатъ отступати отъ Создателя и Бога своего, * долготерпѣливый Господь посла многія праведныя мужи и пророки, * отъ нихже послѣдній бысть святый праведный пастырь Кронштадтскій Іоаннъ, * призывая грѣшныя къ покаянію, * и возвѣщая гнѣвъ Господень на нераскаявшихся, * но не послуша сихъ народъ. * Тогда предаде Богъ прежде благочестивую землю русскую веліимъ гоненіемъ на вѣру, * яко да грѣшныя вразумитъ, * вѣрныя же возвеличитъ и прославитъ * чрезъ терпѣніе, страданія и смерть за Христа, * являя сонмъ святыхъ новомучениковъ, * отъ нихже великій бысть страстотерпецъ царь мученикъ Николай съ царицею и чады и слуги, * яже нынѣ молятся о душахъ нашихъ. (Дважды.)

Гласъ 2. Подобенъ: Егда отъ древа.

Егда ты, царю мучениче, отъ богоборцевъ заключенъ бывъ, * велію радость съ царицею и чады имѣлъ еси, * егда служитель Божій посѣщаше тя, * службу Божію совершая. * Такова благочестиваго царя и Помазанника Божія * множайшіи отъ народа отвратишася, * яко забыша слово Божіе, * призывающее почитати царя, * и пріиде на вся ны гнѣвъ Божій. * Сего ради въ покаяніи зовемъ: * Господи, подаждь страждущей странѣ Россійстѣй, *предстательствомъ великаго страстотерпца царя мученика * отъ богоборныхъ избавленіе * и возставленіе престола православныхъ царей.

Воспѣваемъ тя, царю мучениче, * и многострадальный страстотерпче, * понеже всѣхъ въ сердцѣ своемъ вмѣщалъ еси, * якоже Павелъ апостолъ, * алчущаго насыщая, * скорбящаго утѣшая, и страждущему соскорбя, * о заблуждающихъ печалуя, *осужденнаго злодѣя милуя, * клевету и неправду кротко снося, * о вѣрѣ и благочестіи ревнуя, * славу и богатство міра сего нивочтоже вмѣняя, * паче же отягощаяся ими, * попеченіе о мирѣ всего міра имѣя, * любовію ко всѣмъ пламенѣя. * Пріими и насъ въ сердце твое, * о многострадальный царю и великій страстотерпче, * и моли милостиваго Бога, да помилуетъ насъ, * и подастъ намъ крѣпость подражатели твои быти.

Ины стихиры, гласъ 6. Подобенъ: Всю отложивше.

Боговѣнчанная мученице, святая царице Александро, * кто изречетъ твое воистину евангельское житіе? * Прешла еси отъ иновѣрія къ вѣрѣ православнѣй, * юже воспріяла еси всѣмъ сердцемъ твоимъ, * возлюбивши молитву, храмъ и святыя таинства, * еще же поученія святыхъ отецъ, * возрастивши чада твоя во благочестіи, * и уготовляющи ихъ къ мученію за Христа, * терпящи кротко клевету забывшихъ Бога, * и не разумѣвающихъ истиннаго благочестія твоего, * сего ради молимъ тя, *моли Христа Бога, Егоже возлюбила еси, * да спасетъ души наша.

Велія вѣра твоя, святая мученице царице Александро, * въ горцѣмъ заточеніи отъ богоборцевъ бывши, * и чающи мученическія смерти, * глаголала еси сице: * да уготовимъ себе къ срѣтенію небеснаго Жениха, * Богъ исполняетъ и озаряетъ душу мою неизглаголанною радостію и тишиною, * душа моя ликуетъ, * разумѣющи, яко Женихъ приближается, * душа моя трепещетъ, яко Богъ близъ есть, * да просимъ у Господа себѣ и всему міру грѣховъ прощенія, * помолимся о забывающихъ молитися и о всѣхъ людехъ. * Исходатайствуй, святая мученице, и намъ грѣховъ прощеніе, * и велію милость.

Святый мученикъ царевичъ Алексій, * возлюби силу крестную. * Сія вѣра крестная поможе ему * безъ роптанія понести страдальческій крестъ неизцѣльнаго недуга * чрезъ всю его маловременную жизнь, * и съ терпѣніемъ и упованіемъ пріяти мученическую кончину за Христа. * И нынѣ на небесѣхъ молися о насъ, * вѣрою и любовію совершающихъ память твою, * да подастъ и намъ Господь, * вѣру и терпѣніе и любовь.

Святіи мученицы Христовы, царевны Ольго, Татіано, Маріе и Анастасіе, * яви васъ Христосъ, яко ангелы во странѣ Россійстѣй, * бысте бо чистоты, любве и состраданія образъ, * имже научистеся отъ благочестивѣйшихъ родителей своихъ, * любовь велію имущи ко всѣмъ, наипаче ко страждущимъ, * имже послужисте, по заповѣди Христовой: * боленъ и посѣтисте Мене, * егда же гоненіе, заточеніе и поношеніе наста, * добродѣтели величайшія вѣры, кротости, терпѣнія и всепрощенія показасте, * воспѣвающе святыя молитвы, * и полагающе надежду на Бога, * взывающе ко Господу предъ иконы многими, * ихже устроисте у себе, * моляся кротко за враговъ, * неповинно васъ терзающихъ и убивающихъ. * Кротость и терпѣніе ваше сердца злодѣевъ умягчаше. * Велія ваша добродѣтели на земли, * велія слава на небесѣхъ, * святыя невѣсты Христовы, * молитеся о душахъ нашихъ.

Слава, гласъ 8. Богоизбранная преподобномученице княгине Елисавето, * егда буря безбожія на землю русскую найде, * сія глаголала еси: * якоже въ бури естественнѣй бываютъ: * нѣцыи бѣгутъ, иніи поражаются, * инѣмъ же очи душевніи открываются, * да видятъ величіе Божіе, * тако и въ вихрѣ житейстѣмъ приключаются, * душа бо твоя въ потрясеніихъ узрѣ десницу Божію: * лютое убіеніе твоего мужа [3] * приведе тя къ служенію Богу и ближнимъ: * немощнымъ, оставленнымъ и увѣчнымъ служила еси со смиреніемъ и любовію, * еще же воспріяла еси иноческое житіе, * и бѣжати отъ богоборцевъ не восхотѣла еси, * безъ страха пріимши мученическую смерть за Христа. * Мы же почитающе благоуханныя мощи твоя [4], *усердно просимъ: * моли о чтущихъ твоя подвиги и страданія.

И нынѣ, богородиченъ: Царь Небесный за человѣколюбіе на земли явися, * и съ человѣки поживе: * отъ Дѣвы бо чистыя плоть пріемый, * и изъ нея прошедый съ воспріятіемъ: * Единъ есть Сынъ, сугубъ естествомъ, * но не ѵпостасію. * Тѣмже совершенна Того Бога, * и совершенна Человѣка воистинну проповѣдающе, * исповѣдуемъ Христа Бога нашего: * Егоже моли, Мати безневѣстная, * помиловатися душамъ нашимъ.

 

Входъ. Прокименъ дне. 

Премудрости Соломони чтеніе (Глава 3):Праведныхъ души въ руцѣ Божіей, и не прикоснется ихъ мука. Непщевани быша во очесѣхъ безумныхъ умрети, и вмѣнися озлобленіе исходъ ихъ: и еже отъ насъ шествіе сокрушеніе, они же суть въ мирѣ. Ибо предъ лицемъ человѣческимъ, аще и муку пріимутъ, упованіе ихъ безсмертія исполнено, и вмалѣ наказани бывше, великими благодѣтельствовани будутъ, яко Богъ искуси я, и обрѣте ихъ достойны себѣ. Яко злато въ горнилѣ искуси ихъ, и яко всеплодіе жертвенное пріятъ я. И во время посѣщенія ихъ возсіяютъ, и яко искры по стеблію потекутъ. Судятъ языкомъ, и обладаютъ людьми, и воцарится Господь въ нихъ во вѣки. Надѣющіися Нань уразумѣютъ истину, и вѣрніи въ любви пребудутъ Ему, яко благодать и милость въ преподобныхъ Его, и посѣщеніе во избранныхъ Его.

 

Царствъ третіихъ чтеніе (Глава 8):Ста Соломонъ предъ лицемъ олтаря Господня, предъ всѣмъ соборомъ израилевымъ, и воздѣвъ руцѣ свои на небо, и рече: Господи Боже Израилевъ, нѣсть Богъ, якоже Ты на небеси горѣ, и на земли долѣ. Аще бо небо, и небо небесе не довлѣютъ Тебѣ, како храмъ сей, егоже создахъ Имени Твоему; обаче и призриши на молитву мою, Господи Боже Израилевъ, услышати моленія и молитву, еюже рабъ Твой молится предъ Тобою къ Тебѣ днесь: Да будутъ Очи Твои отверсты на храмъ сей день и нощь, на мѣсто сіе, о немже глаголалъ еси: будетъ Имя Мое тамо, еже услышати молитву, еюже молится рабъ Твой на мѣстѣ семъ, во дни и нощи: И послушати мольбы раба Твоего, и людей Твоихъ Израиля. И елика аше помолятся къ Тебѣ на мѣстѣ семъ, и Ты услышиши на мѣстѣ жилища Твоего на небеси: и сотвориши, и милостивъ будеши имъ.

 

Пророчества Исаіина чтеніе (Главы 61 и 62):Да возрадуется душа моя о Господѣ, облече бо мя въ ризу спасенія, и одеждею веселія одѣя мя, яко жениху возложи мнѣ вѣнецъ, яко невѣсту украси мя красотою. И яко земля растящая цвѣтъ свой, и яко вертоградъ сѣмена своя прозябаетъ: тако возсіяетъ Господь правду, и радость предъ всѣми языки. Сіона ради не умолкну, и Іерусалима ради не попущу, дондеже убо изыдетъ яко свѣтъ правда моя, спасеніе же мое яко свѣтило разжжется. И узрятъ языцы правду Твою, и вси царіе земстіи славу Твою, и нарекутся именемъ Твоимъ новымъ, еже Господь именуетъ é. И будеши вѣнецъ доброты въ руцѣ Господни, и діадима царствія въ руцѣ Бога Твоего. И ктому не наречешися оставленъ, и земля твоя ктому не наречется пуста: тебѣ бо наречется воля моя, и земля твоя вселенная, яко благоволи Господь въ тебѣ, и земля твоя населится. И яко живяй юноша съ дѣвою, тако поживутъ сынове твои съ тобою. И будетъ, имже образомъ возвеселится женихъ о невѣстѣ, тако возвеселится Господь о тебѣ.

 

На литіи стихира храма: и мученикомъ стихиры, гласъ 3:Слава истинная страданіе есть, * тако бо рече Господь: * Нынѣ прославися Сынъ Человѣческій, * славою Своею на крестѣ страданіе именуя. * Сея крестныя славы сподобишася царственніи мученицы, * иже подражаша страстемъ Спасовымъ, * сего ради возлюби ихъ Христосъ, * и возвеличи на небесѣхъ, * да молятся о душахъ нашихъ.

Слава: гласъ 8: Не суть совѣти Божіи, якоже совѣти человѣчестіи, * и не яко путіе человѣчестіи путіе Божія, глаголетъ Господь, * сего бо смиряетъ и сего возноситъ, * Господь мертвитъ и живитъ, * убóжитъ и богатитъ, * возставляетъ отъ земли убога, * престолъ славы дая ему. * Тако престолъ славы уготова Господь * возлюбленному Своему славному мученику царю Николаю, * воздая ему за благочестіе, * и по крестнѣмъ пути содѣлавъ его жива на небесѣхъ, * яко да молится за народъ свой, *да попеченіе воспріимемъ о царствіи небеснѣмъ, * и о спасеніи душъ нашихъ.

И нынѣ, богородиченъ: Безневѣстная Дѣво, * Яже Бога неизреченно заченши плотію, * Мати Бога Вышняго, * Твоихъ рабовъ мольбы пріими, Всенепорочная, * всѣмъ подающи очищеніе прегрѣшеній: * нынѣ наша моленія пріемлющи, * моли спастися всѣмъ намъ.

 

На стиховнѣ стихиры, гласъ 8. Подобенъ: О преславнаго чудесе.Не о славѣ царства земнаго попеченіе имѣлъ еси, * славный мучениче царю Николае, * егда вѣнчаніе на царство и мѵромъ помазаніе воспріялъ еси, * но помышлялъ еси о славѣ Божіей и о царствѣ небесномъ, * въ молитвѣ предъ народомъ глаголя: * Владыко мой и Господи, * настави мя и вразуми въ великомъ служеніи семъ, * да будетъ со мною Твоя божественная премудрость, * посли ю съ небесъ святыхъ Твоихъ, * да разумѣю, чтó есть угодно предъ очима Твоима, * и чтó есть право по заповѣдемъ Твоимъ, * буди сердце мое Тобою управлено, * еже все устроити ко славѣ Твоей, * и къ пользѣ душевнѣй врученныхъ мнѣ людей. * Сія молитва угодна бысть предъ Богомъ, * и нынѣ, яко мученикъ, не престай молити Бога о пользѣ душевнѣй твоихъ людей, * яко да милостивъ будетъ къ нимъ, * подая намъ оставленіе грѣховъ, * миръ и велію милость.

Стихъ: Вознесохъ избраннаго отъ людей Моихъ.

Яко агнецъ незлобивый, * веденъ бысть царь мученикъ Николай на убіеніе, * съ царицею, и чады, и вѣрными слуги, * и имѣя душу чисту, * ввѣряя себе и присныхъ Богу, никогда же пороптавъ, * пріятъ же кротко смерть за Христа. * И нынѣ предстоя со ангелы и великимъ сонмомъ новомученикъ на небесѣхъ, * молитъ о спасеніи страны Россійскія отъ лютыхъ безбожникъ, * да обратятся къ Богу вси отступившія отъ Него, * да утвердится страхъ Божій въ сердцахъ, * и да возсіяетъ паки вѣра Христова.

Стихъ: Елеемъ святымъ Моимъ помазахъ его.

Сія исповѣдаху святіи царственніи мученицы * предъ неповинною смертію за Христа, * повторяюще святоотеческое завѣщаніе: * мученицы древніи, иже вѣроваху въ Господа Іисуса Христа, * на смерть идяху яко на праздникъ, * открыливше умъ и сердце вѣрою, * осуждени же на смерть духъ миренъ имѣяху, * иже ихъ не оставляше никогдаже, * мирно бо на смерть идяху, * внити во иную жизнь духовную уповающе, * яже отверзается за гробомъ. * Дѣломъ сія словеса испытавше, * нынѣ святіи царственніи мученицы радуются со Христомъ на небесѣхъ, * со дерзновеніемъ молящеся о душахъ нашихъ.

Слава, гласъ 6: Кто изречетъ труды твоя и страданія? * Страстотерпче великій и мучениче царю Николае, * тяжкое бремя власти воспріялъ еси, * не славы ради, * но яко христіанскій царь и слуга Христовъ, * пекійся о пользѣ народа, * множество скорбей претерпѣвъ. * Вся сія попусти Господь за грѣхи народа, * и да явитъ благочестіе твое, * показуя міру терпѣніе твое, * яко многострадальнаго Іова, * да получиши славный мученическій вѣнецъ на небесѣхъ, * Авелеву вѣнцу подобный, * идѣже нынѣ ликуя со ангелы, * предстательствуеши за ны предъ Богомъ, * моляся о спасеніи душъ нашихъ.

И нынѣ, богородиченъ: Творецъ и избавитель мой, Пречистая, * Христосъ Господь изъ твоихъ ложеснъ прошедъ, * въ мя оболкійся, * первыя клятвы Адама свободи. * Тѣмже Ти, Всечистая, * яко Божіи Матери же и Дѣвѣ воистинну, * вопіемъ немолчно: * радуйся ангельски, радуйся Владычице, * предстательство и покрове, * и спасеніе душъ нашихъ.

 

Аще бдѣніе совершается: тропарь дважды, Богородице Дѣво единожды.
Аще поліелей: Тропарь, гласъ 5:Царства земнаго лишеніе, * узы и страданія многоразличныя, * кротко претерпѣлъ еси, * свидѣтельствовавъ о Христѣ даже до смерти отъ богоборцевъ, * страстотерпче великій Боговѣнчанный царю Николае, * сего ради мученическимъ вѣнцемъ на небесѣхъ * вѣнча тя съ царицею, и чады, и слуги твоими Христосъ Богъ, * Егоже моли * помиловати страну Россійскую, * и спасти души наша.

Слава, и нынѣ: богородиченъ: Радуйся двере Господня непроходимая, * радуйся стѣно, и покрове притекающихъ къ Тебѣ, * радуйся необуреваемое пристанище, и неискусобрачная, * рождшая плотію Творца Твоего и Бога, * молящи не оскудѣвай о воспѣвающихъ, * и кланяющихся Рождеству Твоему.

 

НА УТРЕНИ: 

На Богъ Господь, тропарь святыхъ, дважды: Слава: тропарь св. преподобномученицѣ княгинѣ Елисаветѣ, гласъ 4-й:Кротость и смиреніе и любовь * вселивши въ душу свою, * усердно послужила еси страждущимъ, * страстотерпице святая княгине Елисавето, * таже съ вѣрою претерпѣла еси страданія и смерть за Христа, * съ мученицею Варварою. * Съ нею же моли о всѣхъ съ любовію почитающихъ васъ.

И нынѣ: богородиченъ, гласъ 4-й: Еже отъ вѣка утаенное, * и ангеломъ несвѣдомое таинство: * тобою, Богородице, сущымъ на земли явися, * Богъ въ неслитномъ соединеніи воплощаемь, * и крестъ волею насъ ради воспріимъ, * имже воскресивъ первозданнаго, * спасé отъ смерти души наша.

 

По 1-й каѳизмѣ сѣдаленъ, гласъ 7:Трижды отвергся Петръ, * но принесе слезы покаянія, * и абіе помилованъ бысть * и возведенъ въ чинъ первоверховнаго апостола. * Царь же и великій страстотерпецъ Николай аще и отречеся отъ престола, * видя окрестъ себе измѣну и боязнь и обманъ, * и разумѣя, яко вси ближніи военачальницы и народъ отрекошася отъ него, * онъ же не отречеся отъ Христа, * ни отъ любве къ народу своему, * и не восхотѣ бѣжати отъ богоборцевъ, * но кротко вся претерпѣвъ, * пріятъ неповинно мученическую смерть за Христа, * якоже сродницы его благовѣрніи князи Борисъ и Глѣбъ. * Сего ради молимъ тя, страстотерпче царю, * молися Христу Богу, * прегрѣшеній оставленіе даровати * празднующимъ любовію святую память твою.

Слава, и нынѣ: богородиченъ: Молитву пріемши отъ насъ, * въ кровъ Твой, Пречистая Дѣво, прибѣгающихъ, * не престай молящи Человѣколюбца * спастися рабомъ Твоимъ.

 

По 2-й каѳизмѣ, сѣдаленъ, гласъ 7:Съ любовію веліею къ неблагодарнымъ людемъ, * принеслъ еси себе, великій страстотерпче царю, въ жертву за народъ твой, * якоже реклъ еси: * аще потребна есть жертва за народъ, азъ жертва сія буду. * Бóльши сея любве никтоже имать, * аще кто душу свою положитъ за други своя. * Нынѣ же предстоя Христу, Емуже послужилъ еси, * моли о насъ, чтущихъ любовію память твою.

Слава, и нынѣ: богородиченъ: Ужасно чудо зачатія и несказаненъ образъ рождества * въ тебѣ Познася, Приснодѣво Чистая, * ужасаетъ мой умъ и удивляетъ помышленіе. * Слава Твоя, Богородице, всѣмъ бысть радость, * во спасеніе душъ нашихъ.

 

Поліелей и величаніе:Величаемъ васъ, * страстотерпцы святіи царственніи мученицы, * и чтимъ честная страданія ваша, * яже за Христа * претерпѣли есте.

Стихъ: Богъ намъ прибѣжище и сила, Помощникъ въ скорбѣхъ обрѣтшихъ ны зѣло.

Стихъ: Вмѣнихомся, яко овцы заколенія.

Стихъ: Проидохомъ сквозѣ огнь и воду и извелъ еси ны въ покой.

 

По поліелеи, сѣдаленъ, гласъ 7:Егда ты, царю мучениче Николае, царскій престолъ воспріялъ еси, * не просилъ еси у Бога богатства имѣній, ни славы, * ниже душъ противящихся тебѣ, * ниже дній многихъ, * но отъ сердца просилъ еси, якоже премудрый Соломонъ, глаголя: *даждь ми, Господи Боже, премудрость и разумъ. * Сего ради услыша тя Господь, * и даде тебѣ по прошенію твоему, * являя тя ревнителя о благочестіи, * мудраго и смиреннаго царя, * и вѣнча тя за благочестіе славнымъ вѣнцемъ небеснымъ, * да мóлишися о православныхъ людехъ, * предстоя со ангелы святыми на небесѣхъ * у престола Божія.

Слава, и нынѣ, богородиченъ: Пречистая Дѣво, помилуй насъ, * прибѣгающихъ вѣрою къ Тебѣ милосерднѣй, * и просящихъ теплаго Твоего заступленія. * Яко мати Бога вышняго, * моли Сына Твоего, Христа Бога нашего, * спастися рабомъ твоимъ.

Степенна, 1-й антифонъ 4-го гласа.

Прокименъ, гласъ 4: Тебе ради, Господи, * умерщвляеми есмы весь день.

Стихъ: Вмѣнихомся яко овцы заколенія.

Всякое дыханіе: Евангеліе отъ Матѳея, зач. 36.

Псаломъ 50-й: — Слава: Молитвами царственныхъ мучениковъ: — И нынѣ: Молитвами Богородицы: — Помилуй мя, Боже:

 

Стихира, гласъ 6-й:Велію вѣру и дивное терпѣніе, * и любовь ко врагомъ стяжалъ еси, * святый мучениче царю Николае, * во испытаніихъ на Бога надѣяся, * во страданіихъ долготерпя, * враговъ и убивающихъ тя прощая, * и прося не мстити за себе, * понеже реклъ еси, яко зло не побѣдитъ зла, но токмо любовь, * и кончину мученическую за Христа кротко пріемля. * Тѣмже возвеличи тя Христосъ на небесѣхъ, * Егоже моли о вѣрою и любовію чтущихъ тя.

 

Канонъ молебный Богородицѣ, со ирмосомъ на 6 и святому на 8.Канонъ, плачъ царя мученика, егоже краестрочіе: Пощади, Боже, люди согрѣшившія. Гласъ 2 [5].

 

Пѣснь 1. Ирмосъ:Грядите людіе, * поимъ пѣснь Христу Богу, * раздѣльшему море и наставльшему люди, * яже изведе изъ работы египетскія, * яко прославися.

Припѣвъ: Святіи царственніи мученицы, молите Бога о насъ.

Поруганіе зря и разореніе земли своея отъ безбожныхъ врагъ, плакася изъ глубины сердца благочестивый царь, якоже пророкъ Іеремія и тріе отроцы, моляся за люди согрѣшившія и горько стеняше: милостиве Господи, не остави насъ.

О како земля русская, прежде славная въ мірѣ и благоденствующая, плѣнена бысть отъ богоборцевъ; вси дружащіися съ нею отвергошася ея, быша ей врази. Отринулъ есть Господь царя и князя и священника. Виждь, Господи, призри и помилуй.

Щедроты Господни бездна многа, не во вѣкъ отринетъ Господь, но помилуетъ смирившихся и кающихся по множеству милости Своея и избавитъ люди Своя, якоже древле Израиля отъ рабства египетскаго.

Богородиченъ: Съ вѣрою и любовію притекающихъ къ Тебѣ и со страхомъ поющихъ Тя, молитвенный гласъ услыши, Владычице.

Катавасія: Отверзу уста: гласъ 4-й.

 

Пѣснь 3. Ирмосъ:На камени мя вѣры утвердивъ, * разширилъ еси уста моя на враги моя, * возвеселибося духъ мой, внегда пѣти: * нѣсть святъ, якоже Богъ нашъ, * и нѣсть праведенъ паче Тебе, Господи.

Ангелъ Хранитель попущеніемъ Божіимъ отъятъ бысть отъ земли Россійскія, врази ея сташа во главѣ, ненавидящіи ю благоденствуютъ за множество нечестія прежде благочестивыя земли, князи ея пребываютъ въ народѣхъ чуждихъ. Не отрини, Господи, страждущихъ людей Твоихъ до конца, но обрати и утверди ихъ на камени заповѣдей Твоихъ.

Доколѣ, Господи, путь нечестивыхъ спѣется, доколѣ плакати имать земля отъ злобы живущихъ на ней (Іер. 12, 1. 4) Архіереи, священницы, князи и вѣрніи людіе низложени и убіени быша. Доколѣ, Господи, Владыко Святый и истинный, не судиши врагомъ Твоимъ за кровь ихъ? (Апок. 6, 10) Помилуй и избави всѣхъ насъ отъ враговъ Твоихъ и спаси души наша.

Избавленія не имущи, скорби и стенанія исполнися земля прежде христоименитая, во страданіи своемъ глаголя: согрѣшихомъ и беззаконновахомъ отступивше отъ Тебе, Господи, и заповѣдей Твоихъ не послушахомъ, ниже соблюдохомъ. Обрати насъ, Боже, къ покаянію и утверди на недвижимѣмъ камени заповѣдей Твоихъ.

Богородиченъ: Упованіе и надежда наша ты еси, Пресвятая Владычице, спаси страждущее отечество наше, и люди Твоя молящіяся и имя Твое призывающія.

Катавасія: Твоя пѣснословцы, Богородице, * живый и изобильный источниче, * ликъ себѣ совокупльшія духовно утверди, * въ Божественнѣй Твоей славѣ, * вѣнцевъ славы сподоби.

 

Кондакъ св. мученицѣ княгинѣ Елисаветѣ. Гласъ 4:Отъ славы царственныя, * вземши крестъ Христовъ, * прешла еси къ славѣ небеснѣй, молящися за враговъ, * и обрѣла еси радость вѣчную, * святая мученице княгине Елисавето, * съ Варварою мученицею, * тѣмже молите о душахъ нашихъ.

 

Сѣдаленъ, гласъ 7:Страстотерпице святая княгине Елисавето, * егда тя живу во Алапаевскую шахту ввергоша, * купно со святыми мученики царскія крове, * яже бѣху князіе Сергій [6], Іоаннъ [7], Константинъ [8], Игорь [9] и Владиміръ [10], * такожде мученица Варвара [11], * и святый мученикъ Ѳеодоръ [12], * изнемогающимъ же надолзѣ всѣмъ отъ ранъ, * облегчала еси еле жива сущи страданія умирающихъ, * воспѣвающи священныя пѣснопѣнія, яже слышаху мимоходящіи. * Сего ради молимъ тя, молися Христу Богу * прегрѣшеній оставленіе даровати * празднующимъ любовію святую память твою.

Слава, и нынѣ, богородиченъ: Егда предстану предъ лицемъ Создателя моего * въ день праведнаго суда Его, * тогда, Владычице, предстани ми, * и вѣчныя муки избави мя, * да не сниду во адъ, но да спасуся * Твоимъ, Пресвятая Богородице, заступленіемъ.

 

Пѣснь 4. Ирмосъ:Пришелъ еси отъ Дѣвы, не ходатай, ни ангелъ, * но Самъ, Господи, воплощся, * и спаслъ еси всего мя человѣка. * Тѣмъ зову Ти: слава силѣ Твоей, Господи.

Беззаконія людей Твоихъ велики быша предъ очима Твоима, Господи, сего ради безбожніи врази святилища Твоя оскверниша и разориша, якоже пророкъ Исаія рече: праздниковъ вашихъ ненавидитъ душа Моя, не стерплю грѣховъ вашихъ, егда прострете руки ваша ко Мнѣ, отвращу очи Мои отъ васъ (Ис. 1, 14-15). Приближаются бо Мнѣ людіе сіи усты своими, сердце же ихъ далече отстоитъ отъ Мене (Ис. 29, 13). Разумѣюще сіе, нынѣ каемся и обращаемся къ Тебѣ, да престанетъ гнѣвъ Твой, да побориши борющіи ны и да речемъ: слава силѣ Твоей, Господи.

О како бремя беззаконій народа Твоего, Господи, умножися, Ты отъялъ еси силу нашу, предалъ еси насъ въ руки беззаконниковъ и содѣлашася вси раби. Токмо Ты, едине Господи, можеши, аще хощеши свободити ны, егда познаемъ грѣхи своя и обратимся къ Тебѣ Создателю нашему и прославимъ Тя.

Жизнь во вѣки блаженная токмо въ Бозѣ есть, но узокъ путь вводяй въ животъ. Сія забы народъ Твой, Господи, и не послуша словесе Твоего, Христе Царю, но широкимъ путемъ грѣха пойде. Пріиде же на ны насиліе и пагуба, изгнаніе и смерть, да уразумѣемъ единый истинный путь Твой, Спасителю нашъ, и обратимся и прославимъ Тя.

Богородиченъ: Ты еси, Пречистая Богородице, прибѣжище наше и утвержденіе. Моли Сына Твоего и Бога нашего подати намъ спасеніе и грѣховъ оставленіе.

 

Пѣснь 5. Ирмосъ:Свѣта подателю * и вѣковъ Творче, Господи, * во свѣтѣ Твоихъ повелѣній настави насъ, * развѣ бо Тебе иного Бога не знаемъ.

Егда отринулъ есть Господь царя и князя и священника, храмы же и жертвенники и святилища Своя не пощадѣ, тогда возскорбѣхъ, сердце мое смятеся во мнѣ, воздыхаю и нѣсть утѣшающаго. Призри, Господи, и пощади, просвѣти ны повелѣніи Твоими, да обратимся къ Тебѣ и послужимъ Ти.

Людіе Твои, Господи, бѣжати вожделѣша отъ насилія враговъ и не возмогоша, иніи же въ народѣхъ чуждихъ скитаются. Сіе бысть, яко ложніи вожди вѣщаша суету и безуміе и не глаголаху о грѣсѣхъ, да отвратятъ гнѣвъ Божій, плѣненіе и изгнаніе. Нынѣ отверзоша на ны уста своя вси врази наша, поскрежеташа зубы своими и рѣша: поглотимъ ихъ. Возстани, воззови въ нощи, изливай молитву ко Господу, простирая къ Нему руцѣ и глаголя: виждь, Господи, погибель нашу, просвѣти, призри и помилуй.

Юноши и дѣвы, старцы и младенцы неповинніи убіени быша, погна врагъ душу мою, смирилъ есть въ землю животъ мой, посадилъ мя есть въ темныхъ, яко мертвыя отъ вѣка, и уны во мнѣ духъ мой, во мнѣ смятеся сердце мое, погибе сила моя и надежда моя на Господа. Помяни, Господи, нищету мою и горесть. Сія глаголахъ въ сердцѣ моемъ, сего ради потерплю страданіе отъ Бога, яко да призритъ Господь на смиреніе мое.

Богородиченъ: Бога, Егоже родила еси, Пречистая Маріе, моли рабомъ Твоимъ подати прегрѣшеній оставленіе.

 

Пѣснь 6. Ирмосъ:Во глубинѣ грѣховнѣй содержимъ есмь, Спасе, * и въ пучинѣ житейстѣй обуреваемь, * но якоже Іону отъ звѣря, * и мене отъ страстей возведи, и спаси мя.

Даде Господь утѣшеніе, яко милость Господня не остави насъ, и не скончашася щедроты Его, обновляются бо на всякъ день. Сего ради будемъ надѣющеся на Бога, Господь часть наша есть, пребудемъ уповающе на Него, могущаго избавити насъ отъ всѣхъ бѣдъ, якоже Іону отъ звѣря морскаго.

Ищущимъ Бога благо есть, благъ бо Господь надѣющимся на Него, благо душѣ въ терпѣніи ожидающей спасенія Божія, дающей лице свое біющему и пріемлющей поношеніе, яко не на вѣки отринетъ Господь, но избавитъ отъ погибели души смирившихся и уповающихъ на Него.

Согрѣшившимъ людемъ посла Господь гóре, но помилуетъ по велицѣй благости и любви въ попеченіи Своемъ, порази бо и огорчи сыны человѣческія не отъ изволенія сердца Своего, но егда попраша заповѣди Его, яко отъ Вышняго исходитъ наказаніе и благоденствіе. Да не возропщетъ о наказаніи всякъ живущій, да сѣтуетъ же о грѣсѣхъ своихъ и восплачетъ, дондеже приклонится и увидитъ Господь съ небесе.

Богородиченъ: Нынѣ къ Тебѣ прибѣгаю, Пречистая, спаси мя молитвами Твоими и соблюди: елика бо хощеши, можеши, яко Мати Всемогущаго.

Катавасія: Божественное сіе и всечестное, * совершающе празднество, * богомудріи, Богоматере, * пріидите руками восплещимъ, * отъ Нея рождшагося Бога славимъ.

 

Кондакъ, гласъ 6:Надежда царя мученика съ царицею и чады и слуги укрѣпи, * и къ Твоей любви окрыли, * будущій имъ покой предвозвѣстивши, * тѣхъ молитвами, Господи, помилуй насъ.

Икосъ: Зря вѣру Христову благочестивымъ царемъ во странѣ Россійстѣй укрѣпляему, и не терпя сего, врази Божіи погубити христолюбиваго царя мученика Николая умыслиша, и предаша его неповиннѣй смерти со благочестивою царицею и чады и слуги и со всѣмъ царственнымъ родомъ, но прельстишася, яко путь нечестивыхъ погибнетъ, праведницы же во вѣки живи будутъ, и вмѣсто пагубы и вреда, сотвориша ихъ славныя мученики и заступники предъ Богомъ. Кровію ихъ и новомученикъ всѣхъ страна Россійская, богоборцы угнетаемая, спасена будетъ, понеже кровь сія сѣмя новой жизни во Христѣ есть, тѣхъ молитвами, Господи, помилуй насъ.

 

Пѣснь 7. Ирмосъ:Образу златому на полѣ Деирѣ служиму, * тріе Твои отроцы небрегоша безбожнаго велѣнія, * посредѣ же огня ввержени, орошаеми пояху: * благословенъ еси Боже отецъ нашихъ.

Обрати ны, Господи, къ Тебѣ, и обратимся, обнови дни наша служеніемъ Тебѣ, якоже прежде, яко благословенъ еси, и хвально и прославлено имя Твое во вѣки. Яко праведенъ еси во всемъ, яже сотворилъ еси намъ, и вся дѣла Твоя истинна, и прави путіе Твои, и вси суди Твои истинни. Сего ради душею сокрушенною и духомъ смиреннымъ глаголемъ: благословенъ еси Боже, препѣтый и превозносимый во вѣки.

Господи Боже, благословенъ еси, яко истиннымъ судомъ навелъ еси сія вся страданія на ны, грѣхъ ради нашихъ. Яко согрѣшихомъ и беззаконновахомъ и не соблюдохомъ и не сохранихомъ, якоже заповѣдалъ еси намъ, да благо намъ будетъ и да прославимъ имя славы Твоея святое, препѣтое и превозносимое во вѣки.

Рѣшителю всѣхъ долговъ грѣховныхъ, Господи, благодать подаждь прощенія прегрѣшившей странѣ Россійстѣй, юже наказалъ еси ранами горькими. Обаче не во гнѣвѣ Твоемъ, но по множеству щедротъ Твоихъ и неизреченнѣй милости Твоей очисти землю православную отъ безбожныхъ враговъ, возстави, Щедрый, царя Помазанника Твоего и услыши ны, миръ церкви и спасеніе людемъ Твоимъ даруй, молитъ Тя царь страстотерпецъ и весь безчисленный сонмъ новыхъ мученикъ, Единаго благословеннаго Бога отецъ нашихъ.

Богородиченъ: Богородице Дѣво, рождшая Слово паче слова, Зиждителя Твоего, Того моли съ царемъ великомученикомъ, царицею и чады и слуги и прочими царственными мученики и всѣми новомученики Россійскими, помиловати души наша.

 

Пѣснь 8. Ирмосъ:Въ пещь огненную ко отрокомъ еврейскимъ снизшедшаго, * и пламень въ росу преложшаго Бога, * пойте дѣла яко Господа, * и превозносите во вся вѣки.

Шуяго стоянія избави насъ, Господи, вся къ пользѣ нашей строяй, пославый огненное очищеніе странѣ нашей, да непрестанно взываемъ: благословите вся дѣла Господня Господа.

Имамы сокровище веліе вѣру святую, юже Христосъ намъ недостойнымъ даде, да сохранимъ ю во благоденствіи и во страданіихъ, якоже сонмъ великій новыхъ страстотерпецъ даже до смерти вѣру сохрани, и да глаголемъ съ ними: Господа пойте дѣла и превозносите во вѣки.

Возжелавъ всеблагій Богъ явити крѣпость вѣры и силу терпѣнія царственныхъ мученикъ, даде имъ испити чашу горькихъ страданій и пріяти мученическую смерть, они же не поропташа, но яко агнцы незлобивіи не отверзоша устъ своихъ, съ терпѣніемъ же и радостію вся претерпѣша, взывающе: Господа пойте и превозносите во вѣки.

Богородиченъ: Спасенія ходатаица намъ явилася еси, Богородице, рождшая Спаса и Владыку всѣхъ, тѣмже молимъ Тя: избавленіе отъ безбожникъ исходатайствуй лютѣ страждущей странѣ Россійстѣй, и спасенія сподоби всѣхъ пѣснословящихъ Тя вѣрно во вся вѣки.

Хвалимъ, благословимъ, покланяемся Господеви, поюще и превозносяще во вся вѣки.

Катавасія: Отроки блзгочестивыя въ пещи, * рождество Богородичо спасло есть, * тогда убо образуемое, * нынѣ же дѣйствуемое, * вселенную всю воздвизаетъ пѣти Тебѣ: * Господа пойте дѣла, * и превозносите Его во вся вѣки.

 

Пѣснь 9. Ирмосъ:Отъ Бога Бога Слова неизреченною мудростію пришедшаго обновити Адама, * ядію въ тлѣніе падшаго лютѣ, * отъ Святыя Дѣвы неизреченно воплотившагося насъ ради, * вѣрніи единомудренно пѣсньми величаемъ.

Широкій путь грѣха, вводяй въ погибель, и мнози суть входящіи имъ, (Матѳ. 7, 13) рече Господь. Не послушаша сего евангельскаго гласа людіе Россійстіи, и гнѣвъ Божій постиже ихъ, отъ негоже избави насъ, Христе, молитъ Тя святый великомученикъ царь Николай и иже съ нимъ убіенныя, и яко Человѣколюбецъ помилуй и спаси души наша.

Іисусе Христе Боже нашъ, обрати ны по множеству милости Твоея и спасемся, призри съ небесе милостію и любовію, и виждь, яко предалъ еси насъ въ руки беззаконныхъ и есмы смирени по всей земли грѣхъ ради нашихъ. И нынѣ возслѣдуемъ всѣмъ сердцемъ, и боимся Тебе, и ищемъ лица Твоего. Не посрами насъ, молитвами святыхъ царственныхъ страстотерпцевъ, но спаси души наша.

Яви, Господи, силу Твою, молитъ Тя царь страстотерпецъ, изми насъ отъ безбожныхъ врагъ нашихъ по чудесемъ Твоимъ, и сотвори съ нами по кротости Твоей и по множеству мнлости Твоея, и да посрáмятся вси являющіи рабомъ Твоимъ злая, и крѣпость ихъ да сокрушится и да разумѣютъ, яко Ты еси Господь Богъ единъ по всей вселеннѣй, славенъ и спасаяй души наша.

Богородиченъ: Ты еси крѣпость наша, Ты еси похвала и радованіе, хранительница наша, заступленіе, прибѣжище, предстательница непобѣдимая и покровъ страны Россійскія. Пречистая Богородице, съ царемъ мученикомъ и великимъ сонмомъ новомученикъ моли спасти рабы Твоя.

Катавасія: Всякъ земнородный, * да взыграетъ Духомъ просвѣщаемь, * да торжествуетъ же безплотныхъ умовъ естество, * почитающее священное торжество Богоматере, * и да вопіетъ: * радуйся, всеблаженная, Богородице * чистая Приснодѣво.

 

Свѣтиленъ, гласъ 2:Страдавшіи Тебе ради царственніи мученицы, Христе, * многія муки претерпѣша, * и славныя вѣнцы пріяша на небесѣхъ, * да мóлятся о душахъ нашихъ.

Слава, и нынѣ, богородиченъ: По Бозѣ упованіе имуще на Тя, * Пречистая Богородице, * молимъ Ти ся: рождшагося изъ Тебе умоли * даровати миръ вселеннѣй и велію милость.

 

На хвалитехъ стихиры, гласъ 3:Агнцы чистыя приведостеся ко Владыцѣ, * страстотерпцы царственніи мученицы, * Того молите спасти души наша. (Дважды).

Раны ваша и язвы, * славніи царственніи мученицы, * язвы грѣховныя исцѣляютъ всѣхъ вѣрныхъ, * святіи страдальцы Господни, * многому терпѣнію научающе.

Лютыми ранами и страданьми мучими, * святіи царственніи страстотерпцы, * не отвергостеся истинныя Жизни Господа нашего, * ни богоборцевъ устрашистеся, * тѣмже молитвами вашими * всѣхъ насъ утвердите.

Слава, гласъ 6: Молитвами, Христе, святыхъ мученикъ Твоихъ, * убіенныхъ за вѣру въ Тя, * Великихъ князей Михаила [13], Павла [14], Димитрія [15] и Георгія [16], * и вѣрныхъ царскихъ слугъ: Иліи [17], Василія [18] и Евгенія [19], * Анастасіи [20], Екатерины [21] и Анны [22], * Алексія [23], Іоанна [24], Климента [25], Іоанна [26] и Николая [27], * помилуй и спаси души наша, * яко Благъ и Человѣколюбецъ.

И нынѣ, богородиченъ, гласъ тойже: Богородице, Ты еси лоза истинная, * возрастившая намъ плодъ живота, * Тебѣ молимся, молися Владычице со святыми царственными страстотерпцы и всѣми новомученики, * помиловати души наша.

Славословіе великое. По трисвятомъ, тропарь святыхъ, ектеніи и отпустъ.

 

НА ЛИТУРГІИ.Блаженна пѣснь 3-я и 6-я на 8.

Прокименъ, гл. 4: Тебе ради, Господи, * умерщвляеми есмы весь день.

Стихъ: Вмѣнихомся яко овцы заколенія.

Апостолъ къ Римляномъ, зачало 99.

Аллилуіа, гласъ 1. Стихъ: Богъ намъ прибѣжище и сила, Помощникъ въ скорбѣхъ обрѣтшихъ ны зѣло.

Стихъ: Господи, спаси царя и услыши ны, въ оньже аще день призовемъ Тя.

Евангеліе отъ Іоанна, зачало 52.

Причастенъ: Радуйтеся праведніи о Господѣ, правымъ подобаетъ похвала.

 

Покаянная молитва, читаемая въ день убіенія Царской Семьи 4/17 іюля на литургіи.Благословенъ еси, Господи Боже отецъ нашихъ, и хвально и прославлено имя Твое во вѣки, яко праведенъ еси о всѣхъ, яже сотворилъ еси намъ, и вся дѣла Твоя истинна и прáви путіе Твои, и вси суди Твои истинни: и судьбы истинны сотворилъ еси по всѣмъ, яже навелъ еси на ны. Яко согрѣшихомъ и беззаконновахомъ отступивше отъ Тебе, и прегрѣшихомъ во всѣхъ, и заповѣдей Твоихъ не послушахомъ, ниже соблюдохомъ, ниже сотворихомъ, якоже заповѣдалъ еси намъ, да благо намъ будетъ. И предалъ еси насъ въ руки враговъ беззаконныхъ, мерзкихъ отступниковъ, и человѣкомъ неправеднымъ и лукавнѣйшимъ паче всея земли. И нынѣ нѣсть намъ отверзти устъ: студъ и поношеніе быхомъ рабомъ Твоимъ и чтущимъ Тя. Не предаждь же насъ до конца имене Твоего ради, и не разори завѣта Твоего, и не отстави милости Твоея отъ насъ. Яко, Владыко, умáлихомся паче всѣхъ языкъ и есмы смирени по всей земли днесь, грѣхъ ради нашихъ. И нѣсть во время сіе начальника, пророка и вожда. И нынѣ, возслѣдуемъ всѣмъ сердцемъ и боимся Тебе и ищемъ лица Твоего. Не посрами насъ, но сотвори съ нами по кротости Твоей, и по множеству милости Твоея, и молитвъ ради пречистыя Матере Твоея и всѣхъ святыхъ Твоихъ изми насъ по чудесемъ Твоимъ, и даждь славу имени Твоему, Господи. И да посрáмятся вси являющіи рабомъ Твоимъ злая, и да постыдятся отъ всякія силы и крѣпость ихъ да сокрушится. И да разумѣютъ вси, яко Ты еси Господь Богъ нашъ, единъ и славенъ по всей вселеннѣй, аминь.

 

Молитва святому царю мученику Николаю.Святый страстотерпче царю мучениче Николае, Помазанника Своего тя Господь избра, во еже милостивно и право судити людемъ твоимъ и хранителемъ царства православнаго быти.

Царское служеніе сіе и о душахъ попеченіе со страхомъ Божіимъ совершалъ еси. Испытуя же тя, яко злато въ горнилѣ, скорби горькія Господь ти попусти, якоже Іову многострадальному, послѣди же престола царскаго лишеніе и мученическую смерть посла ти. Вся сія кротко претерпѣвый, яко истинный рабъ Христовъ. наслаждаешися нынѣ вышнія славы у престола всѣхъ Царя, купно со святыми мученики: святою царицею Александрою, святымъ отрокомъ царевичемъ Алексіемъ, святыми царевнами Ольгою, Татіаною, Маріею и Анастасіею и съ вѣрными слуги твоими, таже со святою мученицею княгинею Елисаветою и со всѣми царственными мученики и святою мученицею Варварою.

Но яко имѣя дерзновеніе веліе у Христа Царя, Егоже ради вси пострадаша, моли съ ними, да отпуститъ Господь грѣхъ народа, не возбранившаго убіеніе твое, Царя и Помазанника Божія, да избавитъ Господь страждущую страну Россійскую отъ лютыхъ безбожникъ, за грѣхи наша и отступленіе отъ Бога попущенныхъ, и возставитъ престолъ православныхъ царей, намъ же подастъ грѣховъ прощеніе, и на всякую добродѣтель наставитъ насъ, да стяжимъ смиреніе, кротость и любовь, яже сіи мученицы явиша, да сподобимся небеснаго царствія, идѣже купно съ тобою и всѣми святыми новомученики и исповѣдники Россійскими прославимъ Отца и Сына и Святаго Духа, нынѣ и присно и во вѣки вѣковъ. Аминь.

 

ПОРЯДОКЪ ПОМИНОВЕНІЯ НОВОМУЧЕНИКОВЪ.На Спаси Боже… послѣ святыхъ Бориса, Глѣба и Игоря:

Святыхъ благовѣрныхъ великихъ страстотерпцевъ Царя Мученика Николая, Царицы Мученицы Александры, св. мученика Царевича Алексія, св. мученицъ Царевенъ Ольги, Татіаны, Маріи и Анастасіи, св. преподобномученицъ Княгини Елисаветы и инокини Варвары и всѣхъ Новомучениковъ Россійскихъ.

Послѣ русскихъ святителей:

Иже во святыхъ отецъ нашихъ: Тихона, Патріарха Московскаго исповѣдника, СВЯЩЕННОМУЧЕНИКОВЪ: МИТРОПОЛИТОВЪ Владиміра Кіевскаго, Веніамина Петроградскаго, Петра Крутицкаго, Кирилла Казанскаго, Іосифа Петроградскаго, Агафангела Ярославскаго, АРХІЕПИСКОПОВЪ: Андроника Пермскаго и Гермогена Тобольскаго, ПРЕСВИТЕРОВЪ: Іоанна [28] и Іоанна [29] и всѣхъ Священномучениковъ Россійскихъ.

На отпустѣ въ День памяти царственныхъ мучениковъ 4/17 іюля, а гдѣ ихъ храмъ — ежедневно:

Святыхъ благовѣрныхъ великихъ страстотерпцевъ Царя мученика Николая, Царицы Мученицы Александры, св. мученика Царевича Алексія, св. мученицъ Царевенъ Ольги, Татіаны, Маріи и Анастасіи, св. преподобномученицъ Княгини Елисаветы и инокини Варвары и всѣхъ Новомучениковъ и Исповѣдниковъ Россійскихъ…

На молебнѣ припѣвы:

1) Святіи царственніи мученицы, молите Бога о насъ.

2) Святіи новомученицы и исповѣдницы Россійстіи, молите Бога о насъ.

 

Богу нашему слава. 

Примѣчанія:
[1] Великая Княгиня Елисавета Ѳеодоровна, въ постригѣ Настоятельница Марѳо-Маріинской Обители въ Москвѣ, старшая сестра Царицы Мученицы Александры Ѳеодоровны.
[2] Послушница Великой Княгини Елисаветы Ѳеодоровны.
[3] Великій Князь Сергій Александровичъ, убитый террористами въ Москвѣ въ 1905 г.
[4] Благоухающія мощи св. преп.-мучч. Княгини Елисаветы и инокини Варвары почиваютъ въ Геѳсиманскомъ храмѣ св. Маріи Магдаланы въ Іерусалимѣ. Два гроба съ этими мощами были доставлены туда изъ Китая въ 1921 году.
[5] Канонъ сей составленъ по образцу «Плача пророка Іереміи», стенавшаго о разрушеніи Іерусалима и Вавилонскомъ плѣненіи Израильскаго народа.
[6] Вел. Князь Сергій Михайловичъ, трое сыновей Вел. Князя Константина Константиновича:
[7] князь Іоаннъ Константиновичъ,
[8] князъ Константинъ Константиновичъ,
[9] князь Игорь Константиновичъ,
[10] князь Владиміръ Павловичъ Палѣй, сынъ Вел. Кн. Павла Александровича отъ морганатическаго брака,
[11] сестра Марѳо-Маріинской Обители Варвара Яковлева и
[12] служащій Вел. Кн. Сергія Михайловича Ѳеодоръ Михайловичъ Ремезъ.
[13] Братъ Царя-мученика Вел. Князь Михаилъ Александровичъ.
[14] Вел. Князь Павелъ Александровичъ.
[15] Вел. Князь Димитрій Константиновичъ.
[16] Вел. Князь Георгій Михайловичъ.
[17] Генералъ-Адъютантъ Илья Леонидовичъ Татищевъ.
[18] Гофмаршалъ князь Василій Александровичъ Долгоруковъ.
[19] Лейбъ-медикъ Евгеній Сергѣевичъ Боткинъ.
[20] Фрейлина графиня Анастасія Васильевна Гендрикова.
[21] Гофъ-лектрисса Екатерина Адольфовна Шнейдеръ.
[22] Комнатная дѣвушка Анна Степановна Демидова.
[23] Лакей Алексѣй Егоровичъ Труппъ.
[24] Поваръ Иванъ Михайловичъ Харитоновъ.
[25] Дядька Наслѣдника Цесаревича Климентій Григорьевичъ Нагорный.
[26] Лакей Вел. Княженъ Иванъ Димитріевичъ Сѣдневъ.
[27] Секретарь Вел. Князя Михаила Александровича Николай Николаевичъ Джонсонъ.
[28] Св. первомученикъ протоіерей Іоаннъ Кочуровъ.
[29] Св. священномученикъ протоіерей Іоаннъ Восторговъ.

Источникъ: Служба святымъ царственнымъ мученикамъ. — Montreal: Monastery Press, 1982. — 30 с.